Der Wortschatz ist aus dem Buch von Rainer Hannig, Die Sprache der Pharaonen : Großes Handwörterbuch Ägyptisch-Deutsch (2800-950 v. Chr.), Marburger Edition, Kulturgeschichte der antiken Welt 64, © Verlag Philipp von Zabern, Mainz am Rhein, 2006, gebaut. Die Bezüge zu diesem grundlegenden Werk sind in Klammern mit der Seitennummer.

Bibliography:

Sethe, Kurt, Helck, Wolfgang, Urkunden der 18. Dynastie, Berlin, 1984 (Sethe); Breasted, James Henry, Ancient records of Egypt : historical documents from the earliest times to the Persian conquest, 5 vol., Chicago, 1906-1907 (B II and III); Lalouette, Claire, Thèbes ou la naissance d'un empire, Paris, 1986 (L.)

Reign of Ahmosis

Stela of King Ahmosis, Karnak 

Sethe 14 (L. 131)

ḥr ʿȝ-ḫprw nbtj t(w)t-mswt ḥr-nbw ṯs-tȝwj

nswt-bjt nb tȝwj nb-pḥt(j)-rʿ sȝ-rʿ mry.f jʿḥ-ms ʿnḫ ḏt

sȝ jmn-rʿ n ẖt.f mry.f

jwʿw.f rd(y) n.f nst.f

nṯr nfr n wn-mȝʿ

ṯmȝ-ʿ

nn grg jm.f

sḫm-jr-f mjtt rʿ

sȝtj-gb

jwʿw.f ḥkn m ȝwt-jb

mstjw rʿ ḳmȝ(w).n.f

nḏtj rd(y) n.f tp(t) tȝ / (tpjw-tȝ)

sḥḏ nswyt

nb ȝwt-jb

dd (ṯȝw) r fnḏ^.w ḥmt

wsr pḥtj

dȝr ḫn

dd ʿnḫ

smn mȝʿt

nsw nsyw m tȝ^.w nb^.w

jty ʿ.w.s wʿf jdbwj

wr bjȝyt(?)

sḫm ḫʿw m nḫtt(?) m ks^.yw

nṯrw.sn ẖr ʿnḫ wȝs

wʿ m pt snnw m tȝ

sḫpr(w) jmȝw.f ḥḏḏwt

mrwtj n jmn

smn jȝwt mj nfr-ḥr

nb rnpwt mj ḥm n rʿ

rd rḫ nṯr jwnn.f

ḥbyt nt nṯr nb

nswt m p

ḥḳȝ m tȝ-mrj

sȝw n pt

ḥmw n tȝ

ḥḳȝ.n.f šn(n)t.n jtn

ḥḏt dšrt mn.tj m tp.f

psšt nbwj ẖr st-ḥr.f

ḫʿ(w) twt(.w) m nḫnw.f

bjȝtj ṯnw wnwt.f r wrrt

ḳȝ šwt^.j

sḫm n wȝḏtj n-ḥr.f mj ḥr

ḥḳȝ.n.f tȝwj.fj

jty ʿ.w.s jṯ ḫʿw m ȝḫ-bjt

nb ḫʿw

ḥr wȝḥ mrwt

jw(w) n.f rsjw mḥtjw jȝbtjw jmntjw

jw.f mn(.w) m nb

smn(.w) tȝwj.fj

jṯ.n.f jwʿt wtṯ-sw / wtṯ(w) sw

tȝwj-tmwj ḥm^.w(w) n.f

d.n n.f st jt.f šps^.j

jw ḫfʿ.n.f ḥnmmt

ȝmm.n.f rḫyt

jw pʿt d.sn n.f jȝw

ḥr-nb ḥr (ḏd)

nb.n pw

ḥȝw-nbwt ḥr (ḏd)

šms.n jm.f

tȝ^.w ḥr (ḏd)

wn^.n.n n.f

nswt pw sḥḳȝ(w).n rʿ

sʿȝ(w).n jmn

d.sn n.f jdb^.w tȝ^.w m sp wʿ

psḏ^.t.n rʿ ḥr.s

Karnak Stela 

Sethe 18, l. 3 (B II 30)

jw ḫȝstj^.w m hjms wʿ

ʿḥʿ.w r ʿrrwt.f

jw šʿt.f m ḫnt-ḥn-nfr

hmhmt.f m tȝ^.w fnḫw

snḏt ḥm.f m-ẖnw tȝ pn mj mnw rnpt j^.y.f

jn.sn mȝʿw nfr^.w

ȝṯp.w m jnw n nswt

pr^.r.f jst(?).f ḥr gs(wj).fj mj jʿḥ m ḥr-jb sbȝ^.w

nfr ʿ r šm^.t

hr nmtt

mn rd^.wj

mds ṯbt

ḏsrw rʿ ḫn(.w) ḥr.f

jmn m sȝ.f

jt.f šps^.j mr^.r sw ḥr jr^.t n.f mṯn

jdbwj ḥr (ḏd)

ḥȝ mȝ{n}.n sw

ẖt nb^.ṯ mḥ.tj m mrwt.f

jrt^.j m gȝgȝwt ḥr nswt pn

ḥȝtj^.w ḥr ftft n.f

dg^.g.tw.f mj rʿ wbn.f

mj psḏ jtn

mj ḫʿ ḫprj m jrt^.j

stwt.f m ḥr^.w mj jtm m jȝbt pt

njw ḥr jbȝ m jnwt

mj psḏ jȝḫw m ḥr-jb hrw

ḏdft nb^.ṯ šm.tj

nswt wʿ dwȝ(w).n spdt

ḥs^.y(w).n sšȝt

šfyt ḏḥwtj ḥr gs(wj).fj

d.f n.f rḫ-ḫt

jw.f sšm.f sš^.w r tp-ḥsb

wr-ḥkȝw pw

nb mrwt r nswt nb

mry ḥr rʿ

d.f d n.f ḥȝtj^.w jȝw

jb^.w ḥknw(w) m ẖwt

sḏm^.w pʿt ḥnmmt rḫyt ḥr-nb

šms^.w nswt pn r nmtwt.f

jmj bȝw.f n ktḫw

wʿb^.w ḥr rn.f

twr^.w ḥr ʿnḫ.f

mṯn nṯr pw m tȝ

jm^.w n.f jȝw mj rʿ

dwȝ^.w sw mj jʿḥ

nswt-bjt nb-pḥtj-rʿ ʿnḫ ḏt wʿf ḫȝst nb^.ṯ

jm^.w hnw n nbt tȝ

ḥnwt jdb^.w ḥȝw-nbwt

ḳȝ^.t rn ḥr ḫȝst nb^.ṯ

jr^.t sḫr ʿšȝt

ḥmt-nsw snt jty ʿ.w.s

sȝt-nsw mwt-nsw špst

rḫt-jḫt

nw^.t kmt

ʿwȝ.n.s mnfȝt.s

nbnb.n.s sj

nw.n.s wtḫw^.w.s

jnḳ.s tšw^.w.s

sgrḥ.n.s šmʿw

dr.s btnw^.w.s

ḥmt-nsw jʿḥ-ḥtp ʿnḫ.tj

Sethe 22 (B II 32)

jw grt wḏ.n ḥm.f jr^.t mnw n jt.f jmn-rʿ

m mȝḥ^.w ʿȝ^.w n nbw

m šȝšȝwt nt ḫsbḏ mȝʿ

ḫtm^.w nw nbw

ḥst ʿȝ^.t nt nbw

nmswt ḥswt m ḥḏ

ḳbḥw m nbw

dbḥt-ḥtp m nbw ḥr ḥḏ

mnjwt m nbw ḥr ḥḏ

šbn(.w) m ḫsbḏ ḥr mfkȝt

ṯȝb n kȝ m nbw

ʿgn.f m ḥḏ

ṯȝb n kȝ n ḥḏ

jnḥw m nbw

ʿgn.f m ḥḏ

ṯnyw m ḥḏ

nmswt nt mȝṯ

mḥ(.w) m mḏt

wšmw^.w ʿȝ^.w n ḥḏ

jnḥw m nbw

... jrj m ḥḏ

bnt m hbnj m nbw ḥr ḥḏ

šspw^.w m ḥḏ

spt m nbw

jw wḏ.n ḥm.j jr^.t wjȝ ʿȝ n tp-jṯrw

wsr-ḥȝt-jmn rn.f

m ʿš mȝʿ n tp-ḫtjw

r jr^.t ẖnt.f nfr^.t nt tpj-rnpt

... sʿḥʿ.n.j wḫȝ^.w m ʿš

kȝpw sȝtw m-mjtt

rd.n.j ...

Quarry inscription 

Sethe 25 (B II 27, L. 130)

rnpt-sp 22 ḫr ḥm n nswt-bjt sȝ-rʿ jʿḥ-ms d ʿnḫ

wn ḥtwt m-mȝwt

šd^.t jnr ḥḏ nfr n ʿnw r ḥwwt.f nt ḥḥ^.w m rnpt

... ḥwt ptḥ ḥwt-nṯr nfr(t) jmn m jpt-rst

m mnw nb jr(w) n.f ḥm.f

jtḥ.tw jnr m jḥ^.w jn(w) ... ḫt tȝ^.w fnḫw

jr(y) jn ẖrj-ʿ n rpʿt ḥȝtj-ʿ (mry nb.f) ...

rs-tp n nb tȝwj m smnḫ mnw n nḥḥ ... wrt

mḥ-jb n nṯr nfr ḫtmw-bjtj smr-wʿtj jmj-r ḫtmt nfr-prt

Building inscription 

Sethe 26 (B II 34, L. 137)

ḫpr swt snḏm ḥm.f m ḏȝdw nswt-bjt nb-pḥt(j)-rʿ

sȝ-rʿ jʿḥ-ms d ʿnḫ

rpʿtt wr^.t ḥswt wr^.t jmȝt sȝt-nsw snt nsw ḥmt-nṯr ḥmt-nsw wr^.t jʿḥ-ms nfrt-jrj ʿnḫ.tj

ḫft ḥm.f

wʿ(.w) ḏd.f ḫft snnw.f

ḥr ḥḥ^.j ȝḫt n ntjw-jm

st^.t mw

drp ḥr ḫȝwt

swȝḏ ʿbȝ

m tp-tr nb m psḏntjw m ȝbd prt sm

jḫt-ḫȝwj ȝbd 5.nt 6.nt hȝkr wȝg ḏḥwtt

tp-tr nb n pt n tȝ

ḏd snt.f

wšb.s ḫr.f

sḫȝ.tw nn ḥr sy jšst

sḏd.tw mdwt tn ḥr-jḫ

ptr spr r ḥȝtj.k

nswt ḏs.f ḏd.f ḫr.s

jnk pw sḫȝ.n.j mwt mwt.j mwt jt(.j)

ḥmt-nsw wr^.t mwt-nsw ttj-šrj mȝʿt-ḫrw

wn^.n js.s mʿḥʿt.s m tȝ ȝt ḥr sȝtw wȝst tȝ-wr

ḏd.n(.j) nn ḫr.t

jw ȝb.n ḥm(.j) d^.t jr.t(w) n.s mr ḥwt m tȝ-ḏsr

m sȝḥt mnw nw ḥm(.j)

šd(.tw) š.f

wd(.tw) ḫt^.w.f

smn(.tw) pȝwwt.f

grg(.w) m rmṯ

nḥb.w m ȝḥwt

sȝḥ.w m mnmnt

ḥmw-kȝ ẖrjw-ḥbt ḥr jrt.sn

s nb rḫ tp-rd.f

jsṯ ḏd.n ḥm.f mdwt tn

jw nn ḫws(.w) m jr^.t

jr.n ḥm.f nn

n-ʿȝ-n mr^.r.f sj r jḫt nb^.t

n sp jr nsyw tpjw-ʿ mjtt-jrj n mwwt.sn

jsṯ ḥm.f ḏȝ.f ʿ.f

ḳʿḥ.f ḏrt.f

jr.f n.s ḥtp-dj-nsw gb (psḏt-ʿȝt) psḏt-nḏst ...

... jnpw ḫntj sḥ-nṯr ḫȝ m t ḥnḳt jḥ^.w ȝpd^.w

jwȝ(w) ... n kȝ n ...

Edfu Stela 

Sethe 29 (L. 139)

ḥmt-nṯr nt jmn ḥmt-nsw wr^.t jʿḥ-ḥtp mȝʿ(t)-ḫrw

ḥmt-nsw snt nsw sbk-m-sȝ-f mȝʿ(t)-ḫrw

Stela of Yuf 

Sethe 30 (B II 111)

ḥtp-dj-nswt ḥr-bḥdtj wsjr ȝst

d.sn prt-ḫrw t ḥnḳt jḥ^.w ȝpd^.w jḫt nb^.t nfr^.t wʿb^.t

n kȝ n ḥmt-nsw wr^.t mwt-nsw jʿḥ-ḥtp mȝʿt-ḫrw sȝ.s nb-pḥt(j)-rʿ mȝʿ-ḫrw

d.n.s n.j ḥm-nṯr 2.nw n šȝw n ḫȝwt

jrj-ʿȝ n ḥwt-nṯr wʿb jw-f sȝ jrt-s

ḏd.f

smȝw^.j.n.j js pn n sȝt-nsw sbk-m-sȝ-f

m-ḫt gm^.t.f wȝ(.w) r wȝs

ʿḥʿ.n ḏd.n wʿb pn

j swȝ.tj.sn ḥr wḏ pn

ḏd.j n.tn

d.j sḏm.tn ḥswt.j ḫr ḥmt-nsw wr^.t jʿḥ-ḥtp

d.n.s wj r ḥnk n.s

mnj.n.s wj m rpwt nt ḥmt.s

d.n.s n.j ʿḳw.s

bjt 100

psn 10(?)

ḥnḳt ds 2

pdsw m jḥ nb

sȝḥ.kwj m ḳȝyt m ḫrw

wḥm.n.s n.j kt ḥswt

rd.n.s n.j jḫt.s nb^.t m ḏbȝ

r ḫrp st n ḥmt.s

kt ḥswt nt ḥmt-nsw wr^.t jʿḥ-ms mȝʿt-ḫrw mrrt nswt ʿȝ-ḫpr-kȝ-rʿ mȝʿ-ḫrw

d.n.s wj r sš ḫtmt-nṯr

mnj.n.s wj m rpwt nt ḥmt.s

d.n.s n.j ʿḳw.s 100

ḥnḳt ds 2

wʿbt m jḥ nb

sȝḥ.kwj m ḳȝyt m ḫrw

sš ȝḥwt n ḥr-bḥdtj dnrgj

Ahmes Pen Nekhbet

Sethe 34 (B II 25, L. 174)

ḏd.f

jw šms.n.j nsyw-bjtjw

nṯrw ḫpr.n.j ḫr.sn r nmtwt.sn

ḥr ḫȝst rs^.t mḥt^.t m bw nb ḫpr(w).n.sn jm

nswt-bjt nb-pḥtj-rʿ mȝʿ-ḫrw nswt-bjt ḏsr-kȝ-rʿ mȝʿ-ḫrw

nswt-bjt ʿȝ-ḫpr-kȝ-rʿ mȝʿ-ḫrw nswt-bjt ʿȝ-ḫpr-n-rʿ mȝʿ-ḫrw

nfryt-r nṯr pn nfr nswt-bjt mn-ḫpr-rʿ d ʿnḫ ḏt

jw pḥ.n.j jȝwt nfr^.t

jw.j m ʿnḫ n ḫr-nswt

jw(.j) m ḥswt ḫr ḥm^.w.sn

jw mrwt.j m stp-sȝ ʿ.w.s

(B II 344, L. 175)

wḥm.n n.j ḥmt-nṯr ḥswt ḥmt-nsw wr^.t mȝʿt-kȝ-rʿ mȝʿ(t)-ḫrw

jw šd.n.j sȝt.s wr^.t sȝt-nsw nfrw-rʿ mȝʿ(t)-ḫrw

jw.s m ẖrd jmj mnḏwj

Sethe 35 (B II 20, L. 127)

rpʿt ḥȝtj-ʿ ḫtmw-bjtj smr-wʿtj ...

jmj-r ḫtmt wḥmw kfʿw jʿḥ-ms

ḏd^.w n.f p-n-nḫbt mȝʿ-ḫrw

ḏd.f

jw šms.n(.j) nswt-bjt nb-pḥt(j)-rʿ mȝʿ-ḫrw

kfʿ.j n.f ḥr ḏȝhj ʿnḫ 1 ḏrt 1

Sethe 36 (B II 41, L. 155)

jw šms.n(.j) nswt-bjt ḏsr-kȝ-rʿ mȝʿ-ḫrw

kfʿ.j n.f m kȝš ʿnḫ 1

wḥm jr.n(.j) n nswt-bjt ḏsr-kȝ-rʿ mȝʿ-ḫrw

kfʿ(.j) n.f ḥr mḥtj jmȝw-khk ḏrt 3

Sethe 36 (B II 84, L. 161)

jw šms.n(.j) nswt-bjt ʿȝ-ḫpr-kȝ-rʿ mȝʿ-ḫrw

kfʿ.j n.f m kȝš ʿnḫ 2

ḥrw-r sḳrw-ʿnḫ(w) jn(w).n.j m kȝš

n ḥsb.n.j st

(L. 163)

wḥm jr.n(.j) n nswt-bjt ʿȝ-ḫpr-kȝ-rʿ mȝʿ-ḫrw

kfʿ.j n.f ḥr ḫȝst nt nhrn ḏrt 21

ssmt 1 wrryt 1

Sethe 36 (B II 124, L. 167)

jw šms.n(.j) nswt-bjt ʿȝ-ḫpr-n-rʿ mȝʿ-ḫrw

jn^.t.n(.j) ḥr šȝsw sḳrw-ʿnḫ(w) ʿšȝ wrt

n ḥsb.n.j st

Sethe 38, middle of the page, line 8 (B II 21)

jmj-r ḫtmt wḥmw kfʿw jʿḥ-ms ḏd(w) n.f p-n-nḫbt

ḏd.f

wȝḥ pȝ ḥḳȝ ʿnḫ(.w) ḏt

jw n tš.j r nswt ḥr prj

šȝʿ-m nswt-bjt nb-pḥt(j)-rʿ mȝʿ-ḫrw nfryt-r nswt-bjt ʿȝ-ḫpr-n-rʿ mȝʿ-ḫrw

jw.j m ḥswt nt ḫr-nswt nfryt-r nswt-bjt mn-ḫpr-rʿ ʿnḫ ḏt

rd.n n(.j) nswt-bjt ḏsr-kȝ-rʿ nbw ʿwʿw 2 šbw 2 / 4 msktw

bȝgsw mḏḥt mḥt mḫtbt 1

rd.n n(.j) nswt-bjt ʿȝ-ḫpr-kȝ-rʿ nbw ʿwʿw 4 šbw 4 msktw 1

ʿff 6 mȝj 3 nbw ȝḳḥw 2

rd.n n(.j) nswt-bjt ʿȝ-ḫpr-n-rʿ nbw ʿwʿw 4 šbw 6 msktw 3 mḫtbt 1 ḥḏ ȝḳḥw 2

Reign of Amenhotep I

Biographical inscription of Thure 

Sethe 40 (B II 62)

... ḫr nswt  nswt-bjt nb-pḥt(j)-rʿ

rd.n.f wj r jmj-r ...

ḳd nfr ḥr jb.f wrt

n wn^.t sk m ... šnwt.f

wḥm ḥswt jn sȝ.f nswt-bjt nb tȝwj ḏsr-kȝ-rʿ

rd.n.f wj r jmj-r šnwtj n jmn

r ḫrp kȝt m jpt-swt

ʿḳ.kwj ḥr jb n ḥm.f

rḫ.n.f mnḫt nt jb(.j)

ḥs.n.f wj ḥr jr^.t mȝʿt.f

sp tp(j) n wḥm ḥswt nswt-bjt ʿȝ-ḫpr-kȝ-rʿ

rd.n.f wj r sȝ-nsw

...

wḏ.n.f rd.t(w) n(.j) nbw (šwbtj) nbw ʿwʿw 2

... r wr^.w ʿḥ

rḫ.n.f jḳr ...

...

... m st sḥtp jb

pḥ.n.f jȝwt

sp tp(j) n wḥm ḥswt nswt-bjt ʿȝ-ḫpr-n-rʿ

...

ḥr wpwt nt nswt

smn ...

sʿȝ.n.f wj m ḥr-jb ...

Limestone door of Karnak 

Sethe 43 (B II 44, L. 188)

jr.n.f m mnw.f n jt.f jmn nb nswt tȝwj

sʿḥʿ n.f sbȝ ʿȝ n mḥ 20 r rwt^.j ḥwt-nṯr

m jnr ḥḏ nfr n ʿnw

jr(t) n.f sȝ-rʿ jmn-ḥtp ʿnḫ ḏt

 ...

ḳd pr.f

smnḫ ḥwt-nṯr.f

sʿḥʿ sbȝ rs(j) sḳȝ(.w) ḥtp(.w) m mḥ 20 m jnr ḥḏ nfr n ʿnw

Stela of Keres 

Sethe 45 (B II 51, L. 185)

rnpt-sp 10 ȝbd 1 šmw sw 1 ḫr ḥm n nswt-bjt ḏsr-kȝ-rʿ sȝ-rʿ n ẖt.f jmn-ḥtp

mry wsjr d ʿnḫ

wḏt mwt-nsw n rpʿt ḥȝtj-ʿ ḫtmw-bjtj smr-wʿtj

jmj-r prwj-nbw jmj-r prwj-ḥḏ jmj-r pr wr n mwt-nsw jʿḥ-ḥtp ʿnḫ.tj

wḥmw kȝrs

jw wḏ.n mwt-nsw rd^.t jr.tw n.k mʿḥʿt

r rdw n nṯr-ʿȝ nb ȝbḏw

smn jȝwwt.k nb^.t ḥswt nb(t) jr(t) n.k

twt^.w.k mn(.w) m ḥwt-nṯr m šmsw n nṯr-ʿȝ

smn(.w) n.sn wʿbt

sȝḫ(.w) smnḫ(.w) pȝwwt.sn m sš^.w

...

ḫr jr(.tw) n.k ḥtp-dj-nswt

m jr ḥmt-nsw n mr(w).n.s

n rpʿt ḥȝtj-ʿ ḫtmw-bjtj jmj-r pr wḥmw krs

wʿ mḥ-jb

ẖnm m ḥʿw sḫmt

šms ḥnwt.f r nmtwt.s

ʿḳ.f jb ḫnt rḫyt

sȝ-jb n ḥnwt.f mȝʿ

ḏd^.w n.f mdwt ḥȝp^.t

nkȝ m sḫr^.w ḥnwt.f

sʿr mdwt r-ẖnw ʿḥ

gm ṯsst

snḏm ḳsnwt

ʿḥʿ^.w ḥnwt.f ḥr mdw.f

tkn mȝʿt

rḫ ḫrt-jb

ȝḫ ḏd ḫr ḥnwt.f

wr snḏw m pr mwt-nsw

dns mhwt

mnḫ ḏd

ḥȝp ẖt ḥr sšm ʿḥ

ḫtm r ḥr sḏm^.t.f

sr wḥʿ ṯsst

jmj-r pr wr krs

ḫrp sḫm rs-tp n mwt-nsw

tm ṯn grḥ r hrw

wḥmw krs

ḏd.f

j ḥȝtjw-ʿ sš^.w ẖrjw-ḥbt šmsw^.w ʿnḫ^.w nw mšʿ

ḥs ṯn mr ṯn nṯrw.ṯn njwtj^.w

swḏ.tn jȝwt.tn n ẖrd^.w.tn m-ḫt jȝwj wȝḥ

mj ḏd.tn ḥtp-dj-nswt ... nsw ḳȝ šwt^.j nb ʿnḫ dd mr^.t

nb ḳrst m-ḫt jȝwt

d.f prt-ḫrw t ḥnḳt jḥ^.w ȝpd^.w jḫt nb^.t nfr(t) wʿb^.t

pr^.rt ḥr wdḥw^.w n nb-r-ḏr

n kȝ n ḫtmw-bjtj jmj-r pr wr n mwt-nsw kȝrs

s n mȝʿt ḫnt tȝwj

mtj mȝʿ

šw m grg

ḥrj-tp n wḏʿ-mdt

nḫ mȝr

nḥm jwtj-sw

dd pr^.y s 2

ḥtp(.w) m prw-n-r.f

ʿḳȝ mjtj mḫȝt

snnw m nḏ-ḥr rn

wȝḥ-jb r sḏm mdwt

mjtj nṯr m wnwt.f

sȝ-jb n ḥnwt.f mȝʿ

sḫnt(w).n ḥnwt tȝwj

jmj-r ʿb wḥmt šwt nšmwt

jmj-r pr wr kȝrs

Stela of It-nefer 

Sethe 51 (L. 173)

ḥtp-dj-nsw wsjr nb ḏdw nṯr-ʿȝ nb ȝbḏw

d.f prt-ḫrw t ḥnḳt jḥ ȝpd snṯr mrḥt šs mnḫt jḫt nb^.t nfr^.t wʿb^.t ʿnḫ^.t nṯr jm

dd^.t pt ḳmȝ^.t tȝ jn^.nt ḥʿpj m (ṯpḥt).f

ḏfȝw

ssn^.t ṯȝw nḏm n mḥyt

swr mw ḥr bȝbȝt nt mw

n kȝ n ḥȝtj-ʿ wḥȝt rḫ-nsw mȝʿ mry.f

jt-nfr mȝʿ-ḫrw

ḥmt.f mrrt.f jjy mȝʿ(t)-ḫrw

mnw jr(w).n sn.f sš ḥrj-m-ȝḫt wḥm ʿnḫ

Inscription of Ineni 

Sethe 53 (B II 45)

... ḥwt-nbw

sʿḥʿ.w ʿȝ^.w.f m ḥmtj

ḳmȝ(.w) m sṯȝt wʿ(t)

tjwt jrw m ḏʿmw

Sethe 54 (L. 181)

jw mȝ.n.j jr(t) ḥm.f ...

... ḥsmn ḥmtj sṯt

mnjwt ḳrḥwt wsḫ^.w

jw.j m ḫrp ḥmwt nb^.t

jȝwwt nb^.t ẖr st-ḥr.j

wḏ ...

... jm

ḥb^.w tp-tr r-mjtt-jrw

n jt.f jmn nb nswt tȝwj

jw.w r-ḫt.j

sjp.tw n.j

jnk ḥsb

Sethe 54, line 14 (L. 156)

sb^.t ḥm.f ʿḥʿw m nfr rnpwt m ḥtpw

pr(.w) r pt

ẖnm.n.f jtn

ȝbḫ n.f pr(w).n.f jm.f

Sethe 55 (B II 101)

nṯr nfr ḥw stjw nb pḥtj ssḥ mnṯw

jr.n.f tȝš.f r wpt-tȝ

pḥww m ḳbḥw...

...

...  n ȝbw

ḥrjw-šʿj ẖr jnw.sn mj bȝkw šmʿw mḥw

ḫrp st ḥm.f r wȝst n jt.f jmn r ṯnw rnpt

swȝḏ.tw n.j jḫt nb^.t ḫr nswt-bjt nṯr pn nfr

...

(L. 181)

n mḥ.f jb jm.j

jn.kwj r ḥȝtj-ʿ jmj-r šnwtj

ȝḥwt ḥtp-nṯr ẖr st-ḥr.j

kȝt (nb^.t) mnḫ^.t dmḏ(.w) r-ḫt.j

(L. 189)

jw mȝ.n.j mnw wr^.w jr(w).n.f m jpt-swt

sʿḥʿ(.w) jwnyt šps^.t m wȝḏ^.w

sʿḥʿ(.w) bḫnwt wr^.yt ḥr gs(wj).sj

m jnr ḥḏ nfr n ʿnw

sʿḥʿ(.w) snyt šps^.t r rwt^.j ḥwt-nṯr

m ʿš mȝʿ n tp n ḫtjw

tp^.w.sn m ḏʿmw

jw mȝ.n.j sʿḥʿ ...

bȝk(.w) m ḏʿmw

jw mȝ.n.j sʿḥʿ sbȝ ʿȝ sḫm-fȝw-jmn / jmn-sḫm-fȝw

ʿȝ.f wr m ḥmtj sṯt

šwt-nṯr jmn ḥr.f ms(t) m nbw

jw mȝ.n.j sʿḥʿ tḫn^.wj wr^.wj r rwt^.j ḥwt-nṯr

m jnr n mȝṯ

jw mȝ.n.j mḏḥ dpt šps^.t nt mḥ 120 m

ȝw.s mḥ 40 m wsḫ.s

r ẖn^.t nn tḫn^.w

jw(.w) m ḥtpw ʿḏ(.w) wḏȝ(.w)

sȝḥ.n(.sn) tȝ r jpt-swt

jw mȝ.n.j šȝdw š jr(w).n n.f ḥm.f ḥr jmntt nt njwt

wd(.w) mȝʿ.f m ḫt nb bnr

(L. 197)

jw mȝ.n.j šȝdw ḥrt nt ḥm.f m wʿʿw

n (wn^.t) mȝȝ(w)

n (wn^.t) sḏm(w)

jw ḏʿr.n.j ȝḫt ḥrw...

... mnḫ^.t

tp.j rs(.w) ḥr ḥḥ^.j ȝḫ.t(j).sj

jw sḫpr.n.j ȝḥwt ḳȝḥ

r (sšr) js^.w.sn nw ẖrt-nṯr

kȝt pw n jr.t(w).s ḏr-bȝḥ

šȝ(.w) n.j jr^.t jm (ḫprt) wr^.t

jdn n.s jnbt

...

ḏʿr.n.j n jmjw-ḫt.j

(L. 182)

ḥmwj pw n jb.j

sp.j m rḫ

n rd.tw n.j tp-rd jn tnj

ḥs.tw.j ḥr rḫ.j m-ḫt rnpwt

jn ntj^.w r sn^.t r jr^.t.n.j

ḫrp(t).n.j ...

jw.j ...

jw.j m r-ḥrj n kȝt nb^.t

jw ḥswt.j mn.tj m ʿḥ

mrwt.j ḫr šnwt

sȝḥ.n wj ḥm.f m mrt

ʿḳw.j ḥr šnwt nt pr-nsw m ẖrt-hrw nt rʿ nb

ḥtp nsw m ʿnḫ

pr(.w) r ḥrt

km.n.f rnpwt.f m nḏm-jb

Sethe 58 bottom of the page (B II 116)

bjk jmj sš ... ḫʿ.w ḥr st-ḥr nswt-bjt ʿȝ-ḫpr-n-rʿ

nsy.f kmt

ḥḳȝ.f dšrt

jṯ.n.f jdbwj m mȝʿ-ḫrw

(L. 183)

jw.j m mḥ-jb n nswt m st.f nb^.t

ʿȝ(.w) jr^.t.n.f n.j r jmjw-ḥȝt

pḥ.n.j jȝwt jmȝḫw^.w

jw.j m ḥswt ḥm.f m ẖrt-hrw

snm.tw.j ḥr ḫȝwt nt nsw

m t n ʿbw-r nswt

ḥnḳt mjtt

jwf ḏdȝ rnpwt dḳr^.w šbn^.w

bjt šʿt jrp bȝḳ

jw nḏ.tw ḫrt.j m snb ʿnḫ

m ḏd ḥm.f ḏs.f n mrwt.j

pr(.w) r pt

ẖnm.n.f m nṯrw

Sethe 59 (B II 341, L. 201)

sȝ.f ʿḥʿ(.w) m st.f m nswt tȝwj

ḥḳȝ.n.f ḥr nst nt wtṯ(w) sw

snt.f ḥmt-nṯr ḥȝt-špswt ḥr jr^.t mẖrw tȝ

tȝwj ḥr sḫrw.s

bȝk.tw n.s

kmt m wȝḥ tp

prt-nṯr ȝḫ^.t pr^.t ḫnt.f

ḥȝtt nt šmʿw

mnjt rsjw

pḥwt pw mnḫ^.t nt tȝ-mḥw

nbt wḏ-mdw

mnḫ^.t sḫr^.w.s

hr^.rt jdbwj ḫft mdw.s

ḥs.n wj ḥmt.s

mr.n.s wj

rḫ.n.s jḳr^.w.j m stp-sȝ

sḫwd.n.s wj m jḫt

sʿȝ.n.s wj

mḥ.n.s jmȝw.j m ḥḏ nbw m sšrw nb nfr n pr-nsw

n ḏd.j ḥȝ n.j r jḫt nb^.t

(L. 184)

ḏd.j n.ṯn rmṯ

sḏm^.w

jr.ṯn bw-nfr jr(w).n.j

jr.ṯn mjtt

sb^.t.j ʿḥʿw m ḥtpw

n ḫpr btȝ.j

rnpwt.j m nḏm-jb

nn šnṯy.j

nn srḫ.j

nn ktt.j

nn ḏbʿw.j

jnk ḫrp ḫrp^.w

n ḫpr sk.j

mnḫ jb n nb.f

šw m bȝg

jnk sḏm(w) ḏd^.t.n ḥrj-tp.f

n bḳ jb.j r wr^.w jmj^.w ʿḥ

jw jr.n.j mr^.rt nṯr.j njwtj

šw.j m ḏȝt-r ḥr jḫt nṯr

jr sk^.k(w) rnpwt m ḥsy

wn^.n bȝ.f ʿnḫ(.w) r-ʿ nb-r-ḏr

rn.f nfr(.w) m r ʿnḫw

sḫȝ.t(w).f ȝḫ.f n ḏt

jmȝḫw ḥȝtj-ʿ jmj-r šnwtj n jmn sš jnnj mȝʿ-ḫrw

Inscription of Ineni II 

Sethe 68 (L. 181)

rpʿt ḥȝtj-ʿ ḫrp kȝt nb^.t m jpt-swt

prwj-ḥḏ ẖr st-ḥr.f

prwj-nbw ḥr ḏbʿwt.f

ḫtm ḫtmt nb^.t m pr jmn

ḥȝtj-ʿ jmj-r šnwtj n jmn jnnj mȝʿ-ḫrw

Inscription of Ineni III 

Sethe 69 (L. 181)

rpʿt ḥȝtj-ʿ ḫrp kȝt m ḥrt nt nswt

jmj-r jȝwt nb^.t m pr jmn

Inscription of Ineni IV 

Sethe 70 (L. 182)

mȝȝ nḥsj^.w

rd^.y(w) m tp^.w sḳrw-ʿnḫ(w) r ḥtp-nṯr n jmn

ḫft sḫrt kȝš ẖs^.t

ḥnʿ jnw n ḫȝswt nb(t)

rd(w).n ḥm.f r ḥwt-nṯr nt jmn

m ḥtr r ṯnw rnpt

Sethe 70 (B II 648)

ḥr-tp ʿ.w.s nswt-bjt ʿȝ-ḫpr-kȝ-rʿ

Sethe 71 (L. 182-183)

pr jmn dbn m snṯr 440

pr mwt (dbn m snṯr) 8-1/2

pr ḫnsw (dbn m snṯr) 8-1/2

pr ptḥ (dbn m snṯr) 8-1/2

pr ḥwt-ḥr (dbn m snṯr) 8-1/2

jpt-rst (dbn m snṯr) 8-1/2

mn-swt (dbn m snṯr) 14-1/2(?)

...

Inscription of Ineni V 

Sethe 73 (L. 183)

ḫns š.f n jmntt

sḳbb ẖr nhwt.f

mȝ(ȝ) mnw.f jpw ʿȝ^.w nfr^.w

jr(w).n.f tp tȝ ẖr ḥswt nṯr pn šps jmn nb nswt tȝwj

Stela of Hor-min 

Sethe 76 (B II 48, L. 171)

ḏd.f

jṯ.n.j rnpwt ʿšȝ^.t m ḥȝtj-ʿ n nḫn

ms.n.j jnw.s n nb tȝwj

ḥs.kwj

n gm.tw sp.j

pḥ.n.j jȝwj m wȝwȝt

jw m mḥ-jb n (nb.j)

ḫd^.d.j ẖr jnw.s n nsw ṯnw rnpt

pr^.r(.j) jm m mȝʿ-ḫrw

n gm.n.tw ḏȝyt.j

Graffito of Ture 

Sethe 78 (L. 171)

rnpt-sp 8 ḫr ḥm n nswt-bjt ḏsr-kȝ-rʿ d ʿnḫ ḏt

rpʿt ḥȝtj-ʿ ḫtmw-bjtj smr-wʿtj

mḥ-jb n nsw m ḫȝswt rs^.t

nḥb(w).n nb tȝwj kȝ.f

sȝ-nsw (t)wrj

Reign of Thutmose I

Coronation decree 

Sethe 80 (B II 54, L. 157)

wḏ-nsw n sȝ-nsw jmj-r ḫȝswt rs^.t twrj

mk jn.n.tw n.k wḏ pn n nswt-bjt r rd^.t rḫ.k

ntt ḥm.j ʿ.w.s ḫʿ(.w) m nswt-bjt ḥr st-ḥr nt ʿnḫw

nn wḥmwtj.f ḏt

jr(.w) nḫbt.j m ḥr kȝ-nḫt mr(y)-mȝʿt

nbtj ḫʿ-m-nsrt ʿȝ-pḥtj

ḥr-nbw nfr-rnpwt sʿnḫ-jbw

nswt-bjt ʿȝ-ḫpr-kȝ-rʿ sȝ-rʿ ḏḥwtj-ms ʿnḫ ḏt r nḥḥ

jḫ dd.k d.tw mȝʿ ḥtp-nṯr n nṯrw tp-šmʿw ȝbw

m jr^.t ḥsst ḥr-tp ʿ.w.s nswt-bjt ʿȝ-ḫpr-kȝ-rʿ d ʿnḫ

jḫ dd.k d.tw mn ʿnḫ m rn n ḥm.j ʿ.w.s

ms.n mwt-nsw sn-j-snb snb.tj

hȝb pw r rd^.t rḫ.k st

ntt pr-nsw ʿḏ(.w) wḏȝ(.w)

... rnpt-sp 1 ȝbd 3 prt sw 21 hrw n ḥb n ḫʿw

Tombos stela 

Sethe 82 (B II 69, L. 159)

rnpt-sp 2 ȝbd 2 ȝḫt sw 15

ḫr ḥm n ḥr kȝ-nḫt mr(y)-mȝʿt nbtj ḫʿ-m-nsrt ʿȝ-pḥtj

ḥr-nbw nfr-rnpwt sʿnḫ-jbw nswt-bjt ʿȝ-ḫpr-kȝ-rʿ d ʿnḫ sȝ-rʿ ḏḥwtj-ms ḏt

... n bs.tw.f

ḫʿ^.t.f m ḥrj-tp tȝwj r ḥḳȝ^.j šn(n)t.n jtn

rsw tȝ-mḥw m-r-ʿ psšt nbwj

smȝt tȝwj

snḏm.f ḥr nst gb

wṯs.t(w) ḫʿw sḫmtj

tj ḥm.f jṯ.n.f jwʿt.f

ḥtp.n.f ṯnṯȝt ḥr

r swsḫ tȝš^.w wȝst

ḥnbwt ḫft-ḥr-nb-s

r bȝk n.s ḥrjw-šʿj

ḫȝstj^.w (bwtyw) nṯr

ḥȝw-nbwt rtḥw-ḳȝbt

rsjw m ḫd

mḥtjw m-ḫntyt

ḫȝswt nb^.t dmḏ^.yw(t) ẖr jnw.sn

n nṯr nfr sp tpj ʿȝ-ḫpr-kȝ-rʿ ʿnḫ ḏt

nḫt(.w) ḥr nb tȝwj

ḥnk.n.f ... ḥrjw-šʿj

wḥwt.sn n.f m sn-tȝ

ẖnwtjw m hbt n ḥm.f

m ksw n jmt-ḥȝt-f

sḫr.n.f wr stjw

nḥsj-wšr-ḫnt n šsp.f

sḥw^.j.n.f tȝš^.w gs^.wj.fj

n ḫpr nhj m nbḏw-ḳd

jw^.w r nḫ.f

n sp wʿ jm

jwntjw-stj ḫr(.w) n šʿt

d^.y ḥr gs ḫt tȝ^.w.sn

ȝs.sn bʿḥ.f jnwt.sn

ṯmsw r^.w.sn mj snmw ḥwyt

ḥȝyw ḥr.s(n) ʿšȝ(.w) n ȝpd^.w